Projektbuxheti 2027 parashikon 75.4 miliardë lekë për infrastrukturën dhe energjinë, ose 2.6 për qind të PBB-së.

Qeveria parashikon të investojë 75.4 miliardë lekë në sektorët e infrastrukturës dhe energjisë gjatë vitit 2027, me fokus ndërtimin dhe zgjerimin e akseve rrugore, zhvillimin e porteve dhe hekurudhave, si dhe përmirësimin e rrjeteve të ujësjellës-kanalizimeve në disa bashki të vendit.

Investimet u prezantuan gjatë diskutimit të projektbuxhetit 2027 në Komisionin Parlamentar për Burimet Natyrore, Infrastrukturën dhe Zhvillimin e Qëndrueshëm. Zëvendësministri i Financave, Andi Mehmeti, bëri të ditur se shpenzimet për infrastrukturën dhe energjinë do të përfaqësojnë 2.6 për qind të Prodhimit të Brendshëm Bruto (PBB).

Investime në ujësjellës dhe kanalizime në disa bashki të vendit

Një pjesë e rëndësishme e financimeve të parashikuara për vitin 2027 do të orientohet drejt përmirësimit të infrastrukturës së furnizimit me ujë dhe rrjeteve të kanalizimeve.

Sipas zëvendësministrit Mehmeti, projektbuxheti përfshin ndërtimin e rrjeteve të ujësjellës-kanalizimeve në bashkitë Mat, Malësi e Madhe, Sarandë, Fier, Lezhë dhe Shkodër, si dhe në Velipojë. Gjithashtu, parashikohet rikonstruksioni i linjave ekzistuese të ujësjellësit në Kukës dhe ndërtimi i depove të ujit në Bashkinë Tiranë.

“Shpenzimet për infrastrukturën dhe energjinë do të zënë 2.6% të prodhimit të brendshëm bruto, me një fond total prej 75.4 miliardë lekësh, ku ndër politikat kryesore mund të përmendim ndërtimin e rrjetit për ujsjellës-kanalizime në bashkinë Mat, me Malësi e Madhe, Sarandë, Fier, Lezhë, Shkodër dhe Velipojë, rikonstruksion i linjave ekzistuese të ujsjellësit të Kukësit etj., si dhe ndërtim i depove të ujit në bashkinë Tiranë”, u shpreh Mehmeti.

Porti i ri i Durrësit dhe tri linja hekurudhore në projektbuxhetin 2027

Zhvillimi i infrastrukturës portuale dhe hekurudhore është një tjetër drejtim i investimeve të parashikuara për vitin e ardhshëm.

Në sektorin portual, projektet kryesore të përmendura nga zëvendësministri i Financave janë ndërtimi i portit të ri të Durrësit dhe investimet në portin e Triportit.

Ndërkohë, në infrastrukturën hekurudhore përfshihen linja Tiranë–Durrës–Rinas, hekurudha Vorë–Hani i Hotit dhe hekurudha Durrës–Rrogozhinë.

Këto projekte janë pjesë e investimeve të planifikuara për zhvillimin e transportit hekurudhor dhe portual, krahas ndërhyrjeve në rrjetin rrugor kombëtar.

Zgjerimi i autostradës Tiranë–Durrës dhe ndërtimi i disa akseve të rëndësishme

Një pjesë e investimeve në infrastrukturën e transportit do të përqendrohet në ndërtimin, zgjerimin dhe përmirësimin e disa akseve rrugore me rëndësi kombëtare.

Në listën e projekteve të përmendura gjatë diskutimit të projektbuxhetit përfshihen aksi Elbasan–Lekaj, bypass-i i Elbasanit, rruga Elbasan–Qafë Thanë, zgjerimi i autostradës Tiranë–Durrës, aksi Tiranë–Ndroq–Plepa dhe bypass-i i Tiranës.

“Porti i ri i Durrësit gjithashtu dhe porti i Triportit hekurudha Tiranë-Durrës-Rinas, hekurudha Vorë-Hani i Hotit, hekurudha Durrës-Rrogozhinë. Aksi Elbasan-Lekaj, bypass-i i Elbasanit, Elbasan-Qafë Thanë, zgjerimi Tiranë-Durrës, Tiranë-Ndroq-Plepa, dhe bypass-i i Tiranës”, u shpreh Mehmeti.

Gjatë diskutimeve në komision, vëmendje iu kushtua edhe financimit të pushtetit vendor, veçanërisht investimeve për përmirësimin e rrugëve rurale.

Menaxhimi i mbetjeve, financime nga buxheti dhe kreditë e huaja

Projektbuxheti 2027 përfshin gjithashtu financime për sektorin e menaxhimit të mbetjeve, me projekte që do të mbështeten nga buxheti i shtetit dhe nga burime të huaja financimi.

Sipas planifikimit të paraqitur në komision, për projektet e menaxhimit të mbetjeve në Elbasan janë parashikuar fonde nga buxheti i shtetit, ndërsa financimi për Fierin planifikohet një vit më vonë.

Ndërkohë, investimet në Vlorë, Kukës, Gjirokastër dhe zona të tjera të vendit do të financohen përmes kredive të huaja.

Në tërësi, fondi prej 75.4 miliardë lekësh për infrastrukturën dhe energjinë në projektbuxhetin 2027 përfshin ndërhyrje në rrjetin rrugor, hekurudhor dhe portual, në sistemet e furnizimit me ujë dhe kanalizimeve, si dhe në menaxhimin e mbetjeve.

Burimi: Scan